അമേരിക്കൻ വിശേഷങ്ങൾ - 30

എ എം എസ്
ഒബാമയുടെ സമഗ്രാരോഗ്യ പദ്ധതി സുപ്രീം കോടതിയിൽ

US Supreme Court

അധികാരത്തിൽ കേറിയ ഉടനെ തന്റെ തെരഞ്ഞെടുപ്പ്‌ വാഗ്ദാനങ്ങളിലൊന്നായ സമഗ്രാരോഗ്യ പദ്ധതി നിയമമാക്കുന്നതിന്‌ ഒബാക്ക്‌ കഴിഞ്ഞു. സാമ്പത്തിക മന്ദ്യത്തിനിടയിൽ അത്‌ ബുദ്ധി പൂർവമായിരുന്നോ എന്ന്‌ ചിന്തിച്ച നിക്ഷപക്ഷമതികൾ ഉണ്ടായിരുന്നു. അതിലെ ചില വകുപ്പുകൾ, പ്രത്യേകിച്ചും ഇൻഷൂറൻസ്‌ നിർബന്ധമായും വാങ്ങിയിരിക്കണം എന്നത്‌, ഭരണഘടന വിരുദ്ധമാണെന്ന്‌ റിപ്പബ്ലിക്കൻകാർ ആരോപിച്ചു. 2008-ൽ ഹിലരി ക്ലിന്റനുമയിട്ടുള്ള പ്രാഥമിക സംവാദത്തിൽ ഒബാമ നിർബന്ധ ഇൻഷൂറൻസിന്‌ എതിരായിരുന്നു. അതുപ്പൊലെ തന്നെ, തൊണ്ണൂറികളിൽ ബിൽ ക്ലിന്റൻ ഭരിക്കുന്ന സമയത്ത്‌ ഭൂരിഭാഗം  റിപ്പബ്ലിക്കൻകാരും നിർബന്ധ ഇൻഷൂറൻസിന്‌ അനുകൂലമായ നിലപാട്‌ എടുത്തിരുന്നു. രണ്ട്‌ പേരും അവരുടേ നിലപാടുകൾ മാറ്റി. റിപ്പബ്ലിക്കൻ പാർട്ടി ഭരിക്കുന്ന സംസ്ഥാനങ്ങളിൽ അത്‌ നടപ്പാക്കാനാകില്ലെന്ന്‌ ശഠിച്ചു. ഒടുവിൽ സംസ്ഥാനങ്ങളിലെ ഫെഡറൽ കോടതികളിലും പിന്നീട്‌ സുപ്രിം കോടതിയിലും അത്‌ ചെന്നെത്തി. കഴിഞ്ഞ മാർച്ച്‌ 26, 27, 28 തിയതികളിലായി സുപ്രിം കോടതി ഗവർന്മെന്റിന്റേയും, നിയമത്തെ എതിർക്കുന്നവരുടെയും വാദം കേട്ടു. 9 ജഡ്ജിമാരിൽ 5 പേർ റിപ്പാബ്ലിക്കൻ പ്രസിഡണ്ടുമാർ നിയമിച്ചതും, 4 പേർ ഡെമോക്രാറ്റ്‌ പ്രസിഡണ്ടുമാർ നിയമിച്ചതുമാണ്‌. ജൂൺ മാസത്തോട്‌ കോടതി അവസാനവിധി പ്രഖ്യാപിക്കുമെന്നാണ്‌ കരുതുന്നത്‌. നവമ്പറിൽ പ്രസിഡണ്ട്‌ തെരഞ്ഞെടുപ്പ്‌ നടക്കുന്നത്‌ കൊണ്ട്‌ അതിനെ നിർണ്ണായകമായി സ്വാധീനിക്കുന്നതായിരിക്കും വിധി എന്ന കാര്യത്തിൽ തർക്കമില്ല.

കാലാവസ്ഥ വ്യതിയാനത്തിന്റെ സൂചനയായി മാർച്ച്
‌

ആഗോള താപനത്തെ കുറിച്ച്‌ കാലാവസ്ഥ നിരീക്ഷകരും, ശാസ്ത്രജ്ഞന്മാരും മുന്നോട്ട്‌ വെക്കുന്ന നിഗമനങ്ങൾ ശരിവെക്കുന്ന വിധത്തിലായിരുന്നു അമേരിക്കയിലെ മാർച്ച്‌ മാസം. ദേശീയ കാലാവസ്ഥ വിവര കേന്ദ്രം (National Climatic Data Center (NCDC)) മാർച്ച്‌ മാസിലെ ദൈനംദിന കണക്കുകൾ പരിശോധിച്ചപ്പോൾ കണ്ടെത്തിയ വിവർങ്ങൾ അതിശയിപ്പിക്കുന്നതാണ്‌. കഴിഞ്ഞ കാലങ്ങളിൽ മാർച്ച്‌ മാസത്തിൽ ഒന്നോ രണ്ടോ ദിവസമാണ്‌ ശരാശരി റെക്കോഡ്‌ ഉഷ്ണം രേഖപ്പെടുത്താറുള്ളതെങ്കിൽ ഈ വർഷം പതിനഞ്ചിലേറെ ദിവസം റെക്കോഡ്‌ താപം രേഖപ്പെടുത്തി. മിഷിഗൻ, ടെന്നിസി, മിനസോട്ട, ജോർജിയ തുടങ്ങിയ തെക്കു-വടക്കു സംസ്ഥാനങ്ങളിൽ ജനങ്ങൾക്കിടയിൽ വലിയ സംസാരവിഷയമായി തീരൂകയും ചെയ്തു. 1895 മുതലാണ്‌ ശാസ്ത്രീയമായി കാലാവസ്ഥ കണക്കുകൾ ശേഖരിച്ചു തുടങ്ങിയതും അതിന്റെ രേഖകളുള്ളതും. ഈ വർഷം മാർച്ച്‌ മാസത്തിലെ പോലെ തന്നെ ഈ വർഷത്തെ ആദ്യ മൂന്ന്‌ മാസത്തിൽ (quarter) റെക്കോഡ്‌ ചൂട്‌ തന്നെയാണ്‌ രേഖപ്പെടുത്തിയത്‌. രാജ്യത്താകെ ശരാശാരിക്കുമുകളിലുള്ള ഉഷ്ണം, വൻതോതിലുള്ള മഞ്ഞുരുകൽ, മഞ്ഞുവീഴ്ച്ച, പൂമ്പൊടിയുടെ (pollen) അളവിലുള്ള വലിയ വർദ്ധന, വലിയ തോതിലുള്ള ആലിപ്പഴം (hailstone) വീഴ്ച്ച തുടങ്ങി നിരവധി വിശദീകരിക്കാൻ കഴിയാത്ത കാലാവസ്ഥ വ്യതിയാനവുമായാണ്‌ മാർച്ച്‌ മാസം കടന്നുപോയത്‌.

സെയ്ന്റ്‌ ബാർതെലമി (Saint Barthelemy)

1493 - ലാണ്‌ കൊളമ്പസ്‌ ബാർതെലമിയിൽ എത്തുന്നത്‌. തന്റെ സഹോദരനായ ബാർതൊലമേയോയുടെ (Bartolomeo) സ്മരണാർത്ഥമാണ്‌ ദ്വീപിന്‌ ഈ പേര്‌ നല്കിയത്‌. ബി.സി 1800 മുതൽ തന്നെ സിബണെ (ciboney) എന്നറിയപ്പെടുന്ന തദ്ദേശീയവാസികൾ അവിടെ ഉണ്ടായിരുന്നു. 100 എഡി-മുതൽ അരവാക്കൻ ഇന്ത്യൻ തദ്ദേശീയരും, 800 എഡി-യിൽ ഇന്നത്തെ കരീബിയിൽ വംശജരുടെ മുൻ തലമുറക്കാരും ആയിരുന്നു പ്രധാന നിവാസികൾ. 1648-മുതലാണ്‌ ഫ്രഞ്ചുകാർ കുടിയേറി തുടങ്ങിയത്‌. 1758 കുറച്ചുകാലം ബ്രിട്ടീഷുകാർ കോളനിയാക്കിവെച്ചു. പിന്നീട്‌ 1784-ൽ സ്വീഡന്‌ വിറ്റു. 1847 വരെ ഇവിടെ അടിമത്തം നിലനിന്നിരുന്നു. 1946 മാർച്ച്‌ 19-ന്‌ എല്ലാ ദ്വീപുനിവാസികൾക്കും ഫ്രഞ്ച്‌ പൗരത്വം നല്കപ്പെട്ടു. ഫ്രാൻസിന്റെ ഭാഗമായിരുന്ന ദ്വീപിന്‌ 2007 ജൂലൈ 15-ന്‌ സ്വാതന്ത്ര്യം നല്കി. തെരഞ്ഞെടുക്കപ്പെട്ട പ്രസിഡണ്ടും, ടെറിട്ടോറിയൽ, എക്സിക്യൂട്ടിവ്‌ കൗൺസിലുകളും ആണ്‌ ഇപ്പോൾ ഭരണം നടത്തുന്നത്‌. 2012 ജനുവരി ഒന്ന്‌ മുതൽ യൂറോപ്യൻ യൂണിയന്റെ ഭാഗമാണ്‌.

Ghost Crab

പോർട്ടറിക്കോക്ക്‌ കിഴക്കും വെർജിൻ ദ്വീപുകൾക്ക്‌ അടുത്തുമായി സെന്റ്‌ മാർട്ടിൻ, ആഗ്വില (Saint Martin and Anguilla) തെക്കുകിഴക്കുമായാണ്‌ ബാർതെലമി സ്ഥിതിചെയുന്നത്‌. ഡിസംബർ മുതൽ ഏപ്രിൽ വരെ മഞ്ഞുകാലവും, മേയ്‌ മുതൽ നവമ്പർ വരെ മഴയോടെയുള്ള വേനൽ കാലവുമാണിവിടെ. തദ്ദേശീയമായ നൂറു കണക്കിന്‌ സസ്യങ്ങൾ ഇവിടെ ഉണ്ടെങ്കിലും ഇവിടുത്തെ എല്ലാ ജന്തുജാലങ്ങളും വിവിധ ഘട്ടങ്ങളിൽ മനുഷ്യർ  മറ്റിടങ്ങളിൽനിന്നും കൊണ്ടുവന്നതാണെന്ന പ്രത്യേകതയുമുണ്ട്‌. ഇരുപതിലേറേ പൊതു കടൽതീരങ്ങളുള്ള (public beaches) ഈ ദ്വീപ്‌ ധനാഢ്യരുടേയും, പ്രസിദ്ധരുടേയും വിഹാരകേന്ദ്രമാണ്‌. 7000 മാത്രം ജനസംഖ്യയുള്ള ഇവിടേക്ക്‌ വർഷത്തിൽ രണ്ട്‌ ലക്ഷം വിനോദസഞ്ചാരികളാണ്‌ ഒഴുകിയെത്തുന്നത്‌. അതുകൊണ്ടുതന്നെ സമ്പദ്‌ വ്യവസ്ഥയുടെ നട്ടെല്ല്‌ വിനോദസഞ്ചാരമാണ്‌. കൂടാതെ കരകൗശലവസ്തുക്കളുടെ (handicrafts) നിർമ്മാണം തദ്ദേശിയരുടെ ഒരു വരുമാനമാർഗ്ഗമാണ്‌. പേരുകേട്ട ഭക്ഷണ ശാലകളും, രുചിയുള്ള ഭക്ഷണവും, കരീബിയൻ സംഗീതവും ഈ ദ്വീപിലെത്തുന്ന സഞ്ചാരികളെ ആകർഷിക്കുന്നു. അമേരിക്കൻ ഫുട്ബാളിന്റെ മറ്റൊരു പതിപ്പായ റഗ്ബി (Rugby) ഇവിടുത്തെ പ്രധാന കായിക വിനോദമാണ്‌. മഞ്ഞുകാലത്ത്‌ ക്രിസ്തുമസ്‌, നവവത്സര ദിനങ്ങളിൽ  സെയ്ന്റ്‌ ബാർതെലമി സന്ദർശകരെക്കൊണ്ട്‌ നിറഞ്ഞിരിക്കും.

സംസ്ഥാനങ്ങളിലൂടെ.........

ന്യൂ ഹാംഷെയർ (New Hampshire)

അമേരിക്കയിലെ വടക്ക്‌-കിഴക്കൻ മേഖലിയിലെ വളരെ ചെറിയ സംസ്ഥാനങ്ങളിലൊന്നാണ്‌ ന്യു ഹാംഷെയർ. ധാരാളം ഗ്രനെറ്റ് ക്വാറികൾ ഉള്ളത് കൊണ്ട് ഗ്രാനെറ്റ് സംസ്ഥാനം (The Granite State) എന്നാണിതിന്റെ ചെല്ലപേര്‌ (nick name). പതിനേഴാം നൂറ്റാണ്ടിന്റെ ആദ്യ വർഷങ്ങളിലാണ്‌ ഇംഗ്ലീഷുകാരും ഫ്രഞ്ചുകാരും ഇവിടെ എത്തുന്നത്. അതേ നൂറ്റാണ്ടിന്റെ പകുതിയോടെ അവർ ഈ പ്രദേശത്ത് വാസമുറപ്പിക്കുകയും 1676 -ൽ ബ്രിട്ടൻ കോളനിയാക്കുകയും ചെയ്തു. ബ്രിട്ടനിൽനിന്ന്‌ വേർപിരിഞ്ഞ ആദ്യത്തെ സംസ്ഥാനമാണിത്. 1776 ജനുവരിയിൽ വേർപിരിഞ്ഞ് 6 മാസത്തിനുശേഷം 13 കോളനികൾ ചേർന്ന് അമേരിക്കൻ യൂണിയൻ രൂപീകരിച്ചു. പ്രസിഡന്റ് തെരെഞ്ഞുടുപ്പുകളിൽ പാർട്ടികൾക്കുള്ളിലെ പ്രാഥമിക മത്സരങ്ങളിൽ ന്യൂ ഹാംഷെയറിന്‌ സവിശേഷ സ്ഥാനമുണ്ട്. അയോവ കോക്കസ് (iowa caucus) കഴിഞ്ഞാൽ രണ്ടാമതായി ന്യൂ ഹാംഷെയർ പ്രാഥമിക (primary) തെരഞ്ഞെടുപ്പാണ്‌ നടക്കുക. അമേരിക്കയുടെ പതിനാലാമത് പ്രസിഡന്റ് ഫ്രാങ്ക്ലിൻ പിയേർസ് (Franklin Pierce) ന്യൂ ഹാംഷെയർകാരനാണ്‌.

Franklin Pierce

13 ലക്ഷം ജനസംഖ്യയുള്ള ന്യൂ ഹംഷെയറിലെ മഹാഭൂരിപക്ഷവും (94%) വെളുത്ത വർഗ്ഗക്കാരായ ഫ്രെഞ്ച്-ഐറിഷ്-ഇംഗ്ലിഷ് വംശജരാണ്‌. ജനസംഖയുടെ മുന്നിലൊന്ന് ഭാഗം ക്രിസ്തുമത വിശ്വ്വാസികളും, അതിൽ തന്നെ പകുതി വീതം കാത്തലിക്, പ്രൊട്ടസ്റ്റന്റ് വിഭാഗക്കാരുമാണ്‌. കൃഷി, മൃഗസംരക്ഷണം, യന്ത്രനിർമ്മാണം, ടൂറിസം എന്നിവയാണ്‌ പ്രധാന സാമ്പത്തിക സ്രോതസ്സുകൾ. ശരാശരി കുടുംബ വാർഷിക വരുമാനം 50,000 ഡോളർ ആണ്‌. തൊഴിലില്ലായ്മ വളരെ കുറവാണ്‌. സമ്പന്നതയിൽ ഏഴാമത്തെ സ്ഥാനമാണ്‌ ഈ സംസ്ഥാനത്തിനുള്ളത്. വരുമനനികുതിയോ (income tax) വില്പനനികുതിയോ (sales tax) ഇല്ലാത്ത സംസ്ഥാനമാണിത്`. ലാഭവീതം (dividends), പലിശയിൽനിന്നുള്ള വരുമാനം എന്നിവക്ക് 5% നികുതിയുണ്ട്. പക്ഷെ, രാജ്യത്തെ ഏറ്റവും കൂടുതൽ വസ്തു നികുതി (property taxes) ഉള്ള സംസ്ഥാനമാണിത്. ഈർപ്പമുള്ള കടുത്ത വേനൽ കാലവും (humid summers) നനഞ്ഞ തീവ്രമായ മഞ്ഞുകാലവും (wet winters) ഈ സംസ്ഥാനത്തിന്റെ പ്രത്യേകതയാണ്‌. രാഷ്ട്രിയമായി, 1988 -വരെ പൊതുവെ റിപ്പബ്ലിക്കൻ പാർട്ടിയെ പിൻതുണക്കുന്ന സ്വഭാവമായിരുന്നു ന്യൂ ഹാംഷെയറിന്‌ ഉണ്ടായിരുന്നത്. എന്നാൽ ഇപ്പോൾ ചാഞ്ചാടുന്ന സംസ്ഥാനങ്ങളുടെ (swing states) പട്ടികയിലാണ്‌ ഈ സംസ്ഥാനത്തെ ഉൾപ്പെടുത്തിയിരിക്കുന്നത്. സംസ്ഥന തലസ്ഥാനം കോൺകോഡും (Concord) വലിയ നഗരം മഞ്ചസ്റ്ററും (Manchester) ആണ്‌.

ഏപ്രിൽ 5, 2012.

*

അമേരിക്കൻ വിശേഷങ്ങൾ - 29

എ എം എസ്

ഗർഭാധാന പ്രതിരോധനം (contraception)

ഗർഭാധാന പ്രതിരോധനത്തെക്കുറിച്ച് സജീവ ചർച്ചകൾ നടന്ന മാസമായിരുന്നു ഈ വർഷത്തെ ഫെബ്രുവരി. അതിനു കാരണമായത് 2010 മാർച്ചിൽ ഒബാമ ഒപ്പിട്ട സമഗ്രാരോഗ്യനിയമത്തിൽ സ്ത്രീകളുടെ ആരോഗ്യപരിപാലനുവുമായി ബന്ധപ്പെട്ട് ഈ വർഷം കൂട്ടിചേർക്കപ്പെട്ട ഇൻഷൂറൻസ് കമ്പനികളും മതസ്ഥാപങ്ങളടക്കം എല്ലാ ആശുപത്രികളും നിർബന്ധമായും സൗജന്യമായി വർഷത്തിൽ ഒരിക്കൽ നടപ്പാക്കേണ്ട പരിശോധനയും, എല്ല തരത്തിലുള്ള ഗർഭനിരോധനമരുന്നുകളുടെ സൗജന്യമായ വിതരണവുമാണ്‌. നിരവധി അഭിപ്രായ വ്യത്യാസമുണ്ടെങ്കിലും പൊതുവെ ഡെമൊക്രാറ്റുകളെ പിന്തുണക്കുന്ന കാത്തലിക് സമൂഹം ഇതിനെതിരായി വലിയ തോതിൽ രംഗത്തുവന്നു. ഇതു തന്നെ അവസരം എന്ന് കരുതി റിപ്പബ്ലിക്കൻക്കാർ ഒബാമയുടെ “സോഷ്യലിസ്റ്റ്-മതവിരോധ” നയങ്ങളുടെ തുടർച്ചയാണിതെന്ന് ആരോപിക്കുകയും ചെയ്തു. അമേരിക്കയിലെ ക്രിസ്തുമത വിശ്വാസികളിൽ പ്രമുഖമായവ പ്രൊട്ടസ്റ്റന്റ്, കാത്തലിക്, ഇവാജ്ജലിക്കൽ വിഭവങ്ങളാണ്‌. അതിൽ പ്രൊട്ടസ്റ്റന്റുകാർ പൊതുവെ ഗർഭനിരോധനമാർഗങ്ങളെ അനുകൂലിക്കുന്നവരാണ്‌. എന്നാൽ കാത്തിലിക്ക് സമൂഹം അതിനെ എതിർക്കുന്നവരും, ഇവാജ്ജലിക്കൽ വിഭാഗം ചില മാർഗ്ഗങ്ങളെ അനുകൂലിക്കുകയും ചിലതിനെ എതിർക്കുന്നവരുമാണ്‌.

ഇങ്ങിനെയൊക്കെയാണെങ്കിലും ഈ വിഷയത്തിൽ മതങ്ങളുടെ തിട്ടുരം പൊതുവെ അവഗണിക്കുന്ന സ്ത്രീ സമൂഹമാണ്‌ ഇവിടെയുള്ളത്. 90%-ലേറേ സ്ത്രീകൾ ഗർഭനിരോധന മാർഗങ്ങൽ ഒരു വിധത്തിൽ അല്ലെങ്കിൽ മറ്റൊരു വിധത്തിൽ ഉപയോഗിക്കുന്നുണ്ട്. സ്ത്രീസ്വാതന്ത്ര്യത്തിന്റേയും,  സ്ത്രീയുടെ ആരോഗ്യ പരിപാലനത്തിന്റേയും വിഷയമായിട്ടാണ്‌ ഇതിനെ ഭൂരിഭാഗം ഡെമൊക്രാറ്റുകളും, ചുരുക്കം ചില റിപ്പബ്ലിക്കൻക്കാരും, എല്ലാ പുരോഗമനവാദികളും കാണുന്നത്. പൊതുവെ മതവികാരത്തെ വ്രണപ്പെടുത്താൻ ആഗ്രഹിക്കാത്ത ഒബാമ, വൈസ് പ്രസിഡന്റായ ബൈഡന്റെ ഉപദേശത്തെ മറികടന്ന്, തന്റെ ലിബറൽ ഉപദേശക സംഘത്തോടൊപ്പം നിന്നപ്പോൾ അതിത്ര പുലിവാലായി തീരുമെന്ന് കരുതിയില്ല. ഗർഭനിരോധനത്തിനെതിരായി നിലകൊള്ളുന്ന കാത്തലിക് സമൂഹം നടത്തുന്ന സ്ഥാപനങ്ങളിൽ തൊഴിലാളികൾക്ക് ഗർഭനിരോധനമരുന്നുകൾ നിർബന്ധമായും സൗജന്യമായി നല്കണമെന്ന നിയമം അവരെ കലിതുള്ളിക്കുമെന്ന് കാത്തലിക്കായ ബൈഡൻ മുൻകൂട്ടികണ്ടിരുന്നു. കൂടാതെ, സർവേകളിൽ ഒബാമയുടെ അംഗീകാരം കുറഞ്ഞുവരുന്ന തെരഞ്ഞെടുപ്പ് വർഷത്തിൽ ഇത് ഒഴിവാക്കുകയാണ്‌ നല്ലതെന്ന് ബൈഡൻ തിർച്ചറിഞ്ഞിരുന്നു. എന്തായാലും മതസ്ഥാപനങ്ങളെ ഈ നിയമത്തിൽനിന്നും ഒഴിവാക്കുമെന്നാണ്‌ പൊതുവെ കരുതുന്നത്.

ഖേമൻ ദ്വീപുകൾ (Cayman Islands)

പടിഞ്ഞാറൻ കരീബിയൻ കടലിൽ ക്യുബക്ക് തെക്കും ജമൈക്കക്ക് വടക്കു-പടിഞ്ഞാറും സ്ഥിതി ചെയ്യുന്ന ഗ്രാന്റ്, ബ്രാക്ക്, ലിറ്റിൽ എന്നീ ദ്വീപുകളാണ്‌ ഖേമൻ ദ്വ്വിപുകളിലുള്ളത്. 1503 മയ് 10-നാണ്‌ കൊളമ്പസ് ഇവിടേ എത്തുന്നത്. 1586-ൽ ഇവിടെ എത്തിയ ഇംഗ്ലീഷ് സഞ്ചാരി ഫ്രാൻസിസ് ഡ്രേക്ക്  (Francis Drake) ആണ്‌ കരീബിയൻ ദ്വീപിലെ നിയോ ടേയ്നോ (Neo-Taino) ഭാഷയിൽ നിന്നുള്ള പദമായ ചീങ്കണ്ണീ എന്ന അർത്ഥം വരുന്ന ഖേമൻ എന്ന പേരിടുന്നത്. പതിനേഴാം നൂറ്റാണ്ടു വരെ ഇവിടെ ജനവാസമില്ലായിരുന്നു. 1670-ൽ ജമൈക്കയോടൊപ്പം ഖേമൻ ദ്വീപുജ്കളുടെ നിയന്ത്രണവും ബ്രിട്ടീഷുകാർ ഏറ്റെടുത്തു. 1962 വരെ ജമൈക്കയുടെ ഭാഗമായ കോളനിയായിരുന്നു ഖേമൻ. 1962-ൽ ജമൈക്ക സ്വതന്ത്രമായപ്പോൾ ഖേമൻ ബ്രിട്ടീഷ് രാജ്ഞി നിയോഗിക്കുന്ന ഗവർണ്ണർ ഭരിക്കുന്ന കോളനിയായി (crown colony). ഇപ്പോഴും ബ്രിട്ടീഷ് നിയന്ത്രണത്തിലുള്ള പ്രദേശമാണിത് (British Overseas Territory ).

Cayman Islands National Museum

ഖേമൻ ഒരു ഉഷ്ണമേഖല പ്രദേശമാണ്‌. പത്തോളം സസ്തനികളെ ഇവിടെ കാണാം. കൂടാതെ സസ്യ-ജൈവ സമ്പത്തുകൊണ്ട് സമ്പന്നമാണീ പ്രദേശം. 50,000-ത്തിലധികം ജനസംഖ്യയുള്ള ഇവിടത്തെ പ്രധാന വരുമാനമാർഗ്ഗം വിനോദസഞ്ചാരവും, ധനസേവനമേഖലയും (Financial services ) ആണ്‌. 125-ഓളം വ്യാപാര കപ്പലുള്ള ഇവിടുത്തെ സാമുദ്രികവ്യാപാരവും ഒരു വരുമാന സ്രോതസാണ്‌. തൊഴിലാളികളുടെ എണ്ണം പരിമിതമായതുകൊണ്ട് ജനസംഖയുടെ പകുതിയോളം തന്നെ തൊഴിലാളികൾ വിദേശികളാണ്‌. 60%-ലേറെ ആഫ്രികൻ-കൊക്കേഷ്യൻ മിശ്രവംശജരുള്ള (mixed race) ഇവിടത്തെ ജനങ്ങളിൽ മഹാർഭുരിപക്ഷവും ക്രിസ്തുമതവിശ്വാസികളാണ്‌. ജനസംഖ്യയിലേറേ രജിസ്റ്റർ ചെയ്ത വ്യാപാര-വ്യവസായ യുണിറ്റുകൾ ഇവിടെ ഉണ്ട് എന്നുള്ളത് മറ്റൊരു പ്രത്യേകതയാണ്‌. കള്ളപ്പണവും നികുതിയും വെട്ടിക്കാൻ സ്വിസ് ബാങ്കുകളെ ഉപയോഗിക്കുന്നത് പോലെ ഖേമൻ ദ്വീപുകളേയും അമേരിക്കക്കാർ ഉപയോഗിക്കാറുണ്ട്. ഒബാമക്കെതിരെ മത്സരിക്കാൻ പോകുന്ന മിറ്റ് റാമ്നിക്ക് ഖേമൻ ദ്വീപുകളിൽ നിക്ഷേപമുണ്ടെന്ന് ആരോപണമുയർന്നിരുന്നു.

സംസ്ഥാനങ്ങളിലൂടെ..........

അയോവ (Iowa)

അമേരിക്കൻ ഹൃദയഭൂമി (American Heartland) എന്നറിയപ്പെടുന്ന അയോവയെ അമേരിക്കയുടെ മദ്ധ്യ-പടിഞ്ഞാറൻ സംസ്ഥാനങ്ങളുടെ കൂട്ടത്തിലാണ്‌ ഉൾപ്പെടുത്തിയിരിക്കുന്നത്. അയോവെ (Ioway) എന്നറിയപ്പെടുന്ന തദ്ദേശിയരായ ആദിവാസികളുടെ നാമത്തിൽ നിന്നാണ്‌ അയോവ ജനിക്കുന്നത്. 13,000 വർഷങ്ങൾക്ക് മുമ്പ് അമേരിക്കൻ ഇന്ത്യക്കാർ (Native Americans) ഇവിടെ എത്തിചേർന്നു എന്നാണ്‌ കരുതപ്പെടുന്നത്. യൂറോപ്യന്മാർ ഇവിടെ എത്തുന്നതിന്‌ വളരെ മുമ്പ് തന്നെ കൃഷിയിലൂന്നിയ സമ്പന്നമായ ഒരു ജീവിതരീതിയും സംസ്കാരവും ഇവിടെ നിലനിന്നിരുന്നു. പതിനേഴും, പതിനെട്ടും നൂറ്റാണ്ടുകളിൽ ഫ്രാൻസിനും സ്പെയിനും ആയിരുന്നു ആധിപത്യം. 1763-ൽ തദ്ദേശിയരുമായി ഉണ്ടായ യുദ്ധത്തിൽ തോറ്റ ഫ്രാൻസ് അധികാരം സ്പെയിന്‌ കൈമാറുകയാണുണ്ടായത്. പത്തൊമ്പതാം നൂറ്റാണ്ടിൽ അമേരിക്ക ഇടപെടുകയും ആയിരക്കണക്കിന്‌ തദ്ദേശീയരെ കൊല്ലുകയും പാലായനം ചെയ്യിക്കുകയും ചെയ്തു. 1846 ഡിസംബർ 28-ന്‌ ഇരുപത്തിയൊമ്പതാമത്തെ സംസ്ഥാനമായി അമേരിക്കൻ യൂണിയനിൽ ചേർക്കുകയും ചെയ്തു.

 3,800 year old Edgewater Park Site

30 ലക്ഷത്തിലധികം ജനസംഖ്യയുള്ള അയോവയിൽ 50% പ്രൊട്ടസ്റ്റന്റ് വിഭാഗക്കാരും 25% കാത്തലിക് വിഭാഗക്കാരുമാണ്‌. വ്യവസായ സൗഹൃദ സംസ്ഥനങ്ങളിലൊന്നായിട്ടാണ്‌ അയോവയെ കണക്കാക്കുന്നത്. നിർമ്മാണ മേഖല (manufacturing secotr) മറ്റ് സംസ്ഥാനഗളിൽ കുറഞ്ഞുവരുമ്പോൾ ഇവിടെ സ്ഥായിയായി നിലനില്ക്കുന്നു. കൂടാതെ ബാങ്കിങ്ങ്, ധനകാര്യ, സേവനമേഖലകൾ സമ്പദ് ഘടനയെ സഹായിക്കുന്നു. അടുത്തകാലത്തായി പരിസ്ഥിതി സൗഹൃദ ഊർജ്ജസ്രോതസ്സുകളുടെ (soalr, wind) വ്യവസായ യൂണിറ്റുകൾ പച്ചപിടിച്ചുവരുന്നുണ്ട്. രാഷ്ട്രിയമായി റിപ്പബ്ലിക്കൻ കോളത്തിൽ ആയിരുന്ന ഈ സംസ്ഥാനം ഇപ്പോൾ മാറിമറിയുന്ന് (swing) സംസ്ഥാനങ്ങളുടെ കോളത്തിലാണ്‌ ഉൾപ്പെടുത്തിയിരിക്കുന്നത്. പ്രസിഡണ്ട് തെരഞ്ഞെടുപ്പിന്റെ പ്രാഥമിക മത്സരങ്ങൾ ഇവിടെ ആരംഭിക്കുന്നതുകൊണ്ട് ഈ സംസ്ഥാനത്തിന്‌ രാഷ്ട്രിയത്തിൽ സവിശേഷ സ്ഥാനമുണ്ട്. പ്രധാന നഗരങ്ങൾ തലസ്ഥാനമായ ഡെമൊയിൻസ് (Des Moines), സീഡർ റാപ്പിഡ്സ് (Cedar Rapids), ഡേവൻപോർട്ട് (Davenport) എന്നിവയാണ്‌.

മാർച്ച് 5, 2012.

*

അമേരിക്കൻ വിശേഷങ്ങൾ - 28

എ എം എസ്

സമ്പന്നതയുടെ നടുവിലും ദരിദ്രരുടെ എണ്ണം കൂടുന്നു

രണ്ടം ലോക മഹായുദ്ധത്തിനുശേഷം ഉണ്ടായ സാമ്പത്തിക മാന്ദ്യം കഴിഞ്ഞാൽ ഏറ്റവും കൂടുതൽ നീണ്ടു പോയ സാമ്പത്തിക മാന്ദ്യത്തിലൂടെയാണ്‌ അമേരിക്ക ഇപ്പോൾ കടന്നു പോകുന്നത്. ഏതു മാന്ദ്യവും ഏറ്റവും കൂടുതൽ ബാധിക്കുക വരുമാനം കുറഞ്ഞവരേയും (lower middle class) ദരിദ്രരേയും ആണല്ലോ. അമേരിക്കയിലെ ദരിദ്രരുടെ എണ്ണം അടുത്ത കാലത്തൊന്നും കുറയാൻ പോകുന്നില്ലെന്ന് പഠനങ്ങൾ സൂചിപ്പിക്കുന്നു. ആറു വർഷം മുമ്പ് 3.65 കോടി ജനങ്ങൾ ദരിദ്രരേഖക്ക് താഴെ ആയിരുന്നുവെങ്കിൽ ഇപ്പോഴത് 4.62 കോടിയാണ്‌. ഇരുപത്തിയഞ്ച് ശതമാനത്തിലേറെ വർദ്ധന. തൊഴിലില്ലായ്മ വർദ്ധിച്ചതാണ്‌ ദാരിദ്ര്യത്തിന്റെ പ്രധാന കാരണം. ഒരിക്കൽ നഷ്ടപ്പെട്ടുപോയ ചില തൊഴിൽ മേഖലകൾ, പ്രത്യേകിച്ചും ഉത്പാദന മേഖല (manufacturing), ഒരിക്കലും തിരിച്ചു വരില്ലെന്നുള്ളത്, തൊഴിലില്ലായ്മയുടെ കാലയളവ് നീളാൻ കാരണമാകുമെന്ന് പഠനങ്ങൾ തെളിയിക്കുന്നു. ഒരു രാജ്യത്തിന്റെ സമ്പദ് വ്യവസ്ഥ എത്രത്തോളം തൊഴിലവസരങ്ങൾ സൃഷ്ടിക്കുന്നു എന്നുള്ളതിന്റെ അളവുകോലാണ്‌ തൊഴിൽ-ജനസംഖ്യ അനുപാതം (employment-to-population ratio). 16 വയസ്സു മുതൽ 64 വയസ്സു വരെ ഉള്ളവരാണ്‌ തൊഴിൽ എടുക്കാൻ കഴിയുന്നവരായി (working-age population) കണക്കാക്കുക. ആരോഗ്യമുള്ള ഒരു  സമ്പദ് വ്യവസ്ഥയിൽ ഇത് 0.6 മുതൽ 0.7 വരെ ആയിരിക്കും. എന്നാൽ അമേരിക്കയിൽ ഇപ്പോൾ ഈ അനുപാതം 0.586 മാത്രം ആണ്‌.

Soup Kitchen, Detroit, Michigan

ഫ്ളോറിഡ, അരിസോണാ, നെവാഡ, മിഷിഗൻ, ഒഹായോ എന്നി സംസ്ഥാനങ്ങളാന്‌ ഏറ്റവും കൂടുതൽ തൊഴിലില്ലായ്മയുടെ രൂക്ഷതയും ദാരിദ്ര്യവും അനുഭവിക്കുന്നത്. സംസ്ഥാനനിലവാരത്തിൽ നിരവധി ദാരിദ്രനിർമാർജന ചിലവുകൾ വെട്ടിക്കുറക്കപ്പെട്ടിട്ടുണ്ട്. ഭരണാഘടനപരമായി സംസ്ഥാനങ്ങൾക്ക് കമ്മി ബഡ്ജറ്റ് അവതരിപ്പിക്കാൻ കഴിയാത്തത് കൊണ്ടാണിത്. റിപ്പബ്ലിക്കൻ ഭരിക്കുന്ന സംസ്ഥാനങ്ങളിലും, റിപ്പബ്ലിക്കൻ ഭൂരിപക്ഷമുള്ള യു എസ് പ്രതിനിധി സഭയിലും  ചിലവ് ചുരുക്കൽ പ്രമാണിച്ച് സാധാരണ ജനങ്ങൾക്ക്  ഉപകാരപ്രദമായ എല്ലാ പദ്ധതികളും തടഞ്ഞ് വെച്ചിരിക്കുകയാണ്‌. ഇത് ഏറ്റവും കൂടുതൽ ബാധിക്കുക ന്യൂനപക്ഷങ്ങളായ കറുത്തവർഗ്ഗക്കാരേയും, തെക്കെ അമേരിക്കയിൽ കുടിയേറിയ ലത്തീനോ-ഹിസ്പാനിക് വിഭാഗക്കാരേയും ആണ്‌. ദശലക്ഷക്കണക്കിന്‌ ഡോളർ വൻകിട വ്യവസായികളുടേയും, ബിസിനസ്സുകാരുടെയും കയ്യിൽ മുതലിറക്കാതെ കെട്ടിക്കിടക്കുന്നുണ്ട്. ഒബാമ ഭരണത്തിൽ ഉള്ളിടത്തോളം കാലം ഇവർ തങ്ങളുടെ കയ്യിലുള്ള സമ്പത്ത് പുതിയ സംരഭങ്ങൾക്ക് വേണ്ടി വിനിയോഗിക്കുമെന്ന് കരുതാൻ വയ്യ. റിപ്പബ്ലിക്കൻ പാർട്ടിയുടേയും, വൻകിട വ്യവസായികളുടേയും ഈ കള്ളക്കളി ജനങ്ങളെ ബോദ്ധ്യപ്പെടുത്താൻ ഒബാമക്ക് കഴിഞ്ഞില്ലെങ്കിൽ വരുന്ന തെരഞ്ഞെടുപ്പിൽ ഒബാമ ജയിക്കാനുള്ള സാദ്ധ്യത കുറവായിരിക്കും.

ബാർബേഡോസ്‌ (Barbados)

ക്രിക്കറ്റ്‌ പ്രേമികളിൽ ബാർബേഡോസിനെ അറിയാത്തവർ ഉണ്ടാകൻ വഴിയില്ല. അരവാക്കൻ (Arawakan) ഭാഷ സംസാരിക്കുന്ന തദ്ദേശീയരായ ആദിവാസികളുടെ ഭാഷയിൽ “ഇചിറോഗനെയിം” (Ichirouganaim) എന്നായിരുന്നു ബാർബേഡോസിന്റെ മൂലനാമം. ഈ പദത്തിന്റെ അർത്ഥം “പല്ലുള്ള ചെമന്ന ഭൂമി” എന്നാണ്‌. നാലാം നൂറ്റാണ്ടുമുതൽ തെക്കെ അമേരിക്കയിൽ നിന്നെത്തിയ അമേരി-ഇന്ത്യനടക്കമുള്ള തദ്ദേശീയാർ ഇവിടെ വാസമുറപ്പിച്ചിരുന്നു. പതിനഞ്ചാം നൂറ്റാണ്ടിൽ സ്പാത്രം, കോളനിയായിരുന്ന ഏക പ്രദേശമാണിത്.നിഷുകാരും, പതിനാറം നൂറ്റാണ്ടിൽ പോർച്ചുഗീസ്സുകാരും ഇവിടെ എത്തിയെങ്കിലും പതിനേഴാം നൂറ്റാണ്ടിൽ ഇംഗ്ലീഷുകാരുടെ ബാർബേഡോസിനെ കോളനിയാക്കിയത്‌. 1966 നവമ്പർ 30-ന്‌ സ്വതന്ത്രമാകുന്നതുവരെ മാറ്റമില്ലാതെ ബ്രിട്ടന്റെ, ഏതെങ്കിലും ഒരു രാജ്യത്തിന്റെ മാ

ബാർബഡോസ് സ്ഥിതി ചെയ്യുന്നത് തെക്കെ അമേരിക്കക്കും കരീബിയനും ദ്വീപസമൂഹങ്ങൾക്കും അതിർത്തിയിലായതുകൊണ്ട് ചുറ്റിലും നിന്നും വ്വിധ വസ്തുക്കൾ അടിഞ്ഞു കൂടുന്ന പ്രദേശമാണ്‌ (plate tectonics ). അതുകൊണ്ടു തന്നെ 1000 വർഷം കൂടുമ്പോൾ 25 മില്ലിമീറ്റർ കടലിൽനിന്നും ഉയർന്നുകൊണ്ടിരിക്കുന്നു. കൂടാതെ ദ്വീപിന്‌ ചുറ്റും സമുന്ദ്രാന്തർഭാഗ ജീവികൾ നിറഞ്ഞ പർവത നിരകളാണ്‌ (coral reefs). അതുപോലെതന്നെ ഭൂകമ്പം, മണ്ണിടിച്ചിൽ, കൊടുങ്കാറ്റ് തുടങ്ങിയ പ്രകൃതി ദു:രന്തങ്ങൾ കൊണ്ട് നിറഞ്ഞ പ്രദേശവുമാണ്‌. മുന്ന് ലക്ഷത്തിൽ താഴെ മാത്രം ജനങ്ങളുള്ള ഇവിടുത്തെ ജനങ്ങളിൽ മുന്നിലൊന്നു പേരും തലസ്ഥാനമായ ബ്രിഡ്ജ് ടൗണിലും ചുറ്റുമായി ജീവിക്കുന്നു. സാമ്പത്തികമായി അമ്പത്തിയൊന്നാം സ്ഥാനമാണ്‌ ഈ രാജ്യത്തിനുള്ളത്. ചരിത്രപരമായി കരിമ്പ് കൃഷിക്ക് പേര്‌ കേട്ട പ്രദേശമാനെങ്കിലും, ഇപ്പോൽ നിർമ്മാണ മേഖലയും, വിനോദ സഞ്ചാരവും സമ്പദ്ഘടനയുടെ നട്ടെല്ലാണ്‌. കറുത്തവർഗ്ഗക്കാർ കൂടാതെ ഇന്ത്യയിൽ നിന്നും, പ്രത്യേകിച്ച് ഗുജറാത്തിൽ നിന്നും കുടിയേറിയ മുസ്ലിങ്ങൾ, ജൂതന്മർ, ലെബനീസ്-സിറിയൻ വംശജർ, ചൈനക്കാർ എന്നിവർ പ്രധാന നിവാസികളാണ്‌. കേരളത്തിലെ കൊച്ചിയേയും, മാളയേയും പോലെ, തെക്കെ അമേരിക്കൻ ഭൂഖണ്ഡത്തിലെ ഏറ്റവും പഴയ ജൂതപ്പാള്ളി നിലനില്ക്കുന്നത് ബ്രിഡ്ജ് ടൗണിലാണ്‌. സുപ്രസിദ്ധ പോപ് ഗായിക റിഹാന (Rihanna) ഇവിടത്തുകാരിയാണ്‌.

സംസ്ഥാനങ്ങളിലൂടെ...............

മിഷിഗൻ (Michigan)

കാനഡയിലെ ഒന്റാറിയോവും, മിഷിഗൻ അടക്കം അമേരിക്കയിലെ 8 സംസ്ഥാനങ്ങളും ചേർന്ന പ്രദേശമാണ്‌ വൻ തടാക പ്രദേശം (Great Lakes region).ചരിത്ര സാംസ്കാരിക സാമ്പത്തിക വിഷയങ്ങളിൽ വ്യതിരക്തത പുലർത്തുന്ന അമേരിക്കയിലെ പ്രദേശം. മിഷിഗമാ (mishigamaa)എന്ന തദ്ദേശീയ ഭാഷ പദത്തിന്റെ ഫ്രഞ്ച് രൂപത്തിൽനിന്നാണ്‌ മിഷിഗൻ എന്ന നാമം ഉണ്ടാകുന്നത്. 1622-ൽ യൂറോപ്യന്മാർ ഇവിടെ എത്തുന്നതിൻ മുൻപ് ഇവിടെ തദ്ദേശിയരയ വിവിധവിഭാഗത്തിൽ പെട്ട ആദിവാസികൾ ഇവിടെ ഉണ്ടായിരുന്നു. വടക്കെ അമേരിക്കയിലും, കാനഡയിലുമായി ലക്ഷക്കണക്കിന്‌, ആനിഷനാബെ (Anishinabe) എന്നറിയപ്പെടുന്ന, തദ്ദേശിയർ ഉണ്ടായിരുന്നുവെന്ന് കരുതപ്പെടുന്നു. 1688-ൽ ആണ്‌ യൂറോപ്യന്മാർ കുടിയേറി സ്ഥിരതാമസമാക്കിയത്. കത്തോലിക്ക മിഷണറിമാരുടെ കേന്ദ്രവുമായിരുന്നു മിഷിഗൻ. 1660 മുതൽ ഫ്രഞ്ച് കോളനിയായിരുന്ന മിഷിഗൻ, ഫെഞ്ച്-ഇന്ത്യൻ യുദ്ധം (1754-63), അമേരിക്കൻ റെവലൂഷണറി യുദ്ധം, ഏറി തടാക യുദ്ധം (battle of Lake Erie) തുടങ്ങിയ നിരവധി ചരിത്രഘട്ടങ്ങളിലൂടെ കടന്നുപോകുകയും 1836 ജനുവരു 26-ന്‌ ഔദ്യോഗികമായി അമേരിക്കൻ യൂണിയനിൽ ചേരുകയും ചെയ്തു.

Sleeping bear dune aerial view

നിരവധി പ്രത്യേകതകളുള്ള സംസ്ഥാനമാണ്‌ മിഷിഗൻ. വാഹന വ്യവസായത്തിന്റെ കേന്ദ്രം (center of the American automotive industry), 60,000-ൽ കൂടുതൽ തടാകങ്ങളും കുളങ്ങളും ഉള്ള പ്രദേശം, രണ്ട് അർദ്ധ ദ്വീപുകളായി നീണ്ടു കിടക്കുന്ന അമേരിക്കയിലെ ഒരേയൊരു സംസ്ഥാനം, ലോകത്തിലെ തന്നെ ഏറ്റവും നീളമുള്ള ശുദ്ധ ജല തീരമുള്ള (longest freshwater coastline) സ്ഥലം, 45 ദിഗ്രി അക്ഷാംശം (45th parallel north) കടന്നു പോകുന്ന പ്രദേശം, ഏറ്റവും കൂടുതൽ ക്രിസ്മസ് വൃക്ഷം (Christmas tree) കൃഷി ചെയ്യുന്ന സ്ഥലം തുടങ്ങിയവയാണ്‌ അതിൽ പ്രധാനം. ഒരു കോടിയിൽ തഴെ ജനസംഖ്യയുള്ള ഈ സംസ്ഥാനത്തിന്റെ  സമ്പദ്ഘടനയുടെ നട്ടെല്ലാണ്‌ വാഹന നിർമ്മാണം, ധാന്യോത്പാദനം, വിവരസാങ്കേതിക വിദ്യ, ആയുധനിർമ്മാണം, യുദ്ധവിമാന നിർമ്മാണം, ഇരുമ്പുരുക്ക് വ്യവസായം തുടങ്ങിയവ. കൂടാതെ അമേരിക്കയിലെ രണ്ട് പ്രധാന പീറ്റ്സ (pizza) ശൃംഘലയായ ഡോമിനാ-യുടേയും ലിറ്റിൽ സീസറിന്റേയും കേന്ദ്രം മിഷിഗനാണ്‌. കത്തോലിക്ക വിഭാഗത്തിന്‌ വലിയ സ്വാധീനമുള്ള ചുരുക്കം ചില സംസ്ഥാനങ്ങളിലൊന്നാണ്‌ മിഷിഗൻ. റിപ്പബ്ലിക്കൻ പാർട്ടിക്കും ഡെമോക്രാറ്റുകൾക്കും ഏകദേശം തുല്യ പ്രാധാന്യം ഉണ്ടെങ്കിലും കഴിഞ്ഞ അഞ്ച് പ്രസിഡണ്ട് തെരഞ്ഞെടുപ്പിൽ ഡെമോക്രാറ്റുകളെ തുണച്ച സംസ്ഥാനമാണ്‌ ഇത്. ലാൻസിങ്ങ് (Lansing) ആണ്‌ തലസ്ഥനമെങ്കിലും ഓട്ടൊമൊബൈൽ വ്യവസായത്തിന്‌ പെര്‌ കേട്ട ഡിറ്റ്രോയിറ്റ് ആണ്‌ വലിയ നഗരം. മിഷിഗൻ സന്ദർശിക്കാതെ അമേരിക്കൻ യാത്ര പൂർണ്ണമാകില്ലെന്ന് നിശ്ചയമായും പറയാൻ കഴിയും.

ഫെബ്രുവരി 5, 2012.

*

അമേരിക്കൻ വിശേഷങ്ങൾ - 27

എ എം എസ്‌

അയോവ (Iowa) നല്കുന്ന സൂചന

റിപ്പബ്ലിക്കനായാലും ഡെമൊക്രാറ്റ് ആയാലും, മൊത്തം പ്രതിനിധികളുടെ ഒരു ശതമാനം മാത്രമെ പ്രാഥമിക തെരഞ്ഞെടുപ്പിൽ ഉള്ളുവെങ്കിലും, അയോവ സംസ്ഥാനത്തിന്‌ ആദ്യത്തെ പ്രാഥമിക തെരഞ്ഞെടുപ്പ് എന്ന നിലയിൽ വലിയ പ്രാധാന്യമുണ്ട്. 1972 മുതലാണ്‌ ആദ്യത്തെ പ്രാഥമിക് തെരഞ്ഞെടുപ്പ് എന്ന നിലയിൽ പ്രാധാന്യം കൈവരുന്നത്. മാധ്യമങ്ങളിൽ വാർത്തകൾ നിറഞ്ഞു നില്ക്കും. 1,744 ബൂത്തുകളിൽ നിന്നായി 99 കൗണ്ടികളിലേക്കുള്ള സമ്മേളന പ്രതിനിധികളെ ജനുവരി 3-ന്‌ തെരഞ്ഞെടുക്കും. അവരാണ്‌ പിന്നീട് കോൺഗ്രസ് പ്രതിനിധി മണ്ഡല പ്രതിനിധികളേയും പിന്നീട് പ്രസിഡണ്ട് സ്ഥാനാർത്ഥിയെ നിശ്ചയിക്കാനുള്ള അയോവയുടെ പ്രതിനിധികളെ തെരഞ്ഞെടുക്കുന്നത്. ഡെമൊക്രാറ്റ് പാർട്ടിയിൽ ഒബാമക്ക് എതിരില്ലാത്തതുകൊണ്ട് അവിടെ പ്രഥമിക തെരഞ്ഞെടുപ്പിന്‌ പ്രാധാന്യമില്ല.

Ron Paul

അയോവയിൽ ജനുവരി മൂന്നിന്‌ നടന്ന പ്രാഥമിക തെരഞ്ഞെറ്റുപ്പിൽ മിറ്റ് റമ്നിയും, റിക്ക് സാന്റോറവും 25% വോട്ട് നേടി ഒപ്പത്തിനൊപ്പം നിന്നു. വിദേശനയങ്ങളിൽ ഇടതുസ്വഭാവും, അഭ്യന്തര സാമ്പത്തിക നയങ്ങളിൽ വലതുസ്വഭാവവും കാണിക്കുന്ന, ഫെഡെറൽ സംവിധാനത്തിൽ കേന്ദ്ര സർക്കാരിന്റെ സ്വാധീനം പരമാവധി കുറച്ച് മുതലാളിത്ത വിപണിക്ക് കീഴടങ്ങണമെന്ന് വാദിക്കുന്ന, ലിബർട്ടേറിയൻ നയങ്ങളിൽ വിശ്വസിക്കുന്ന റോൺ പോൾ ആണ്‌ മൂന്നാമത് (21%). സ്ഥാനാർത്ഥിത്വം പ്രതീക്ഷിക്കുന്നില്ലെങ്കിലും പ്രതിനിധികളുടെ എണ്ണത്തിൽ നിർണ്ണായക സ്വാധീനം ഉണ്ടാകുമെന്നാണ്‌ പോൾ കരുതുന്നത്. എഴുപത്തിയാറുകാരനാണെങ്കിലും ചെറുപ്പക്കാരുടെ ഇടയിൽ വലിയ സ്വാധീനം പോളിനുണ്ട്. മധ്യ-വലതുപക്ഷക്കാരനായ റാമ്നിയും, യാഥാസ്ഥിതികനായ സാന്റോറവും ആയിരിക്കും പ്രധാന എതിരാളികൾ. 2008-ലെ ഒബാമയും, ഹിലരിയും തമ്മിലുള്ള മത്സരം പോലെ ഇത്തവണ റിപ്പബ്ലിക്കൻ റാമ്നി-സാന്റോറം പ്രാഥമിക മത്സരം നീണ്ടു പോകുമെന്നാണ്‌ പൊതുവെ കരുതപ്പെടുന്നത്.

അരൂബ (Aruba)

കരീബിയൻ കടലിന്റെ തെക്ക് വെനിസൂലക്ക് വടക്കും കൊളമ്പിയക്ക് കിഴക്കുമായിട്ടാണ്‌ അരൂബ സ്ഥിതിചെയ്യുന്നത്. നെതെർലന്റിന്റെ ഭാഗമാണീ പ്രദേശം. യൂറോപ്യന്മാർ അരൂബയെക്കുറിച്ച് അറിയുന്നത് 1499-ൽ ഇവിടെ എത്തിയ അമേരിഗോ വെസ്പൂചി (Amerigo Vespucci) യിലൂടെയാണ്‌.
പതിനാറാം നൂറ്റാണ്ടിലും, പതിനേഴാം നൂറ്റാണ്ടിന്റെ ആദ്യകാലത്തും സ്പെയിനിന്റെ കോളനിയായിരുന്നു അരൂബ. 1636 മുതൽ ഡച്ചുകാരുടെ കീഴിലായി. 1947 ആഗസ്റ്റിൽ അരൂബക്ക് ഡച്ചുകാരിൽനിന്നും സ്വയംഭരണാവകാശം ലഭിച്ചു. രാജ്യത്തെ സംസ്ഥാനങ്ങളായോ, ജില്ലകളായോ ഔദ്യോഗികമായിർ തിരിച്ചിട്ടില്ലെന്നത് അരൂബയുടെ പ്രത്യേകതയാണ്‌. കനേഷുമാരിക്കുവേണ്ടി (Census) വിവിധ പ്രദേശങ്ങളായി തിരിച്ചിട്ടുണ്ടെന്നു മാത്രം.

Aloe

ഒരു ലക്ഷത്തിനുമുകളിൽ മാത്രം ജനസംഖ്യയുള്ള അരുബ കരീബിയൻ മേഖലയിലെ ഏറ്റവും സമ്പന്നമായ പ്രദേശമാണ്‌. 21,000 ഡോളറാണ്‌ ആളോഹരി വരുമാനം. പെട്രോളിയം. സ്വർണ്ണം, ഫോസ്ഫേറ്റ് എന്നിവയുടെ ഖനനം, അലൊ (aloe) ഇനത്തിൽപ്പെട്ട അഞ്ഞൂറിലധികം ചെടികളുടെ കയറ്റുമതി, ടൂറിസം എന്നിവയാണ്‌ സമ്പദ് വ്യവസ്ഥയുടെ നട്ടെല്ല്. യു എസ്, വെനിസൂല, നെതെർലന്റ്സ് എന്നിവയാണ്‌ പ്രധാന വ്യാപാര പങ്കാളികൾ. സമശീതോഷ്ണമേഖലയായതിനാൽ വിനോദസഞ്ചാരികളെ വളരെയധിക ആകർഷിക്കാൻ അരൂബക്ക് കഴിയുന്നു. വെളുത്ത മണൽ നിറഞ്ഞ കടലോരങ്ങൾ മറ്റൊരു ആകർഷണമാണ്‌. മഴ വളരെ കുറവും, പരന്നതും നദികളില്ലാത്തതുമായ ഇവിടം വർഷത്തിലെ ഭുരിഭാഗം സമയത്തും വിനോദസഞ്ചാരികളെക്കൊണ്ട് നിറഞ്ഞിരിക്കും.

സംസ്ഥാനങ്ങളിലൂടെ..........

ന്യു മെക്സിക്കോ (New Mexico)

ഒമ്പത് പർവ്വതനിര സംസ്ഥാനങ്ങളിലൊന്നാണ്‌ (Mountain States ) അമേരിക്കയുടെ തെക്കു-പടിഞ്ഞാറ്‌ സ്ഥിതി ചെയ്യുന്ന ന്യൂ മെക്സിക്കോ. ഭൂപ്രകൃതിയിലും, സംസ്കാരത്തിലും വൈവിധ്യം നിറഞ്ഞ സംസ്ഥാനമാണിത്. അലാസ്ക കഴിഞ്ഞാൽ തദ്ദേശീയർ (Native Americans) ഉള്ള പ്രദേശം. അതുപോലെതാന്നെ സ്പാനിഷ് അധീനതയുടെ ഭാഗമായി കിട്ടിയ സംസ്കാരവും ലാറ്റിനമേർക്കൻ സംസ്കാരവും ഇഴചേർന്നുകിടക്കുന്നു. ഹിസ്പാനിക് (Hispanic) അഥവാ ലാറ്റിനൊ അമേരിക്കൻ ധാരാളം ഉള്ള സ്ഥലം. പാലിയൊ ഇന്ത്യൻ (Paleo-Indians) എന്നറിയപ്പെടുന്ന തദ്ദേശീയരാണ്‌ പതിനാറാം നൂറ്റാണ്ടുവരെ പ്രധാനമായും ഇവിടെ ഉണ്ടായിരുന്നത്. പതിനാറാം നൂറ്റാണ്ടോടെ യൂറോപ്യന്മാർ എത്തിതുടങ്ങി. മെക്സിക്കൻ-അമേരിക്കൻ യുദ്ധത്തിലും, അമേരിക്കൻ യുദ്ധത്തിലും ഈ പ്രദേശം വലിയ പങ്ക് വഹിച്ചു. 1912 ജനുവരി 6-ന്‌ അമേരിക്കൻ കോൺഗ്രസ് നാല്പത്തിയേഴാമത്തെ സംസ്ഥാനമായി യൂണിയനിൽ ചേർത്തു.

Shiprock

രണ്ടു മില്യൻ ജനസംഖയുള്ള ഇവിടുത്തെ പ്രധാന സാമ്പത്തിക സ്രോതസ് പെട്രൊളിയം ഖനനവും, ടൂറിസവും പിന്നെ കേന്ദ്ര ഗവർന്മെന്റിന്റെ സഹായവുമാണ്‌. 30% പേർ സ്പാനിഷ് സംസാരിക്കുന്നവരായതുകൊണ്ട് ഇംഗ്ലിഷും സ്പാനിഷും ഔദ്യോഗിക ഭാഷയാണ്‌. ന്യൂക്ലിയർ ആയുധ നിർമ്മാണ ശാലകളിലൊന്നായ ലോസ് ആലമോസ് (Los Alamos National Laboratory) ഇവിടെയാണ്‌. അതു​‍ാലെ വിനോദ സഞ്ചാരികളെ ആകർഷിക്കുന്ന നിരവധി കേന്ദ്രങ്ങൾ ഇവിടെയുണ്ട്. ചാക്കോ, റിയോ ഗ്രാന്റെ മലയിടുക്കുകൾ, ഓർഗൻ പരവതനിര, വിവിഹ്ദ ദേശീയ സ്മാരകങ്ങൾ, കപ്പലാകൃതിയിലുള്ള പാറ (Shiprock) എന്നിവ അതിൽ ചിലതാണ്‌. വലിയ തോതിൽ സസ്യസമ്പത്തും മൃഗസമ്പത്തും ഉള്ള സംസ്ഥാനം കൂടിയാണിത്. പൊതുവെ പ്രോട്ടസ്റ്റന്റ് വിഭാഗക്കാർക്ക് ഭുരിപക്ഷമുള്ള അമേരിക്കയിൽ കാത്തലിക് സ്വാധീനമുള്ള സംസ്ഥാനം. മാറി മാറി റിപ്പബ്ലിക്കനും ഡെമൊക്രാറ്റും അധികാരത്തിൽ വരുന്ന (swing state) ആണ്‌ ന്യൂ മെക്സിക്കോ.

ജനുവരി 5, 2012.